គ្រឹះស្ថានសិក្សា AIS គ្រោងរៀបចំការប្រកួតគូរគំនូរ និងពិព័រណ៍ស្នាដៃសិស្សឡើងវិញ ក្រោយផ្អាករយៈពេល២ឆ្នាំ ដោយសារវិបត្តិកូវីដ-១៩
លោក ជា សម្បត្តិ នាយកចាងហ្វាង នៃសាលារៀន អន្តរទ្វីប អាមេរិកាំង សាខាទួលគោក បានលើកឡើងថា កម្មវិធីនេះ រៀបចំឡើងក្នុងគោលបំណងឱ្យសិស្សានុសិស្សទាំងអស់ បានដាក់តាំងស្នាដៃផ្សេងៗទៅតាមក្រុមនីមួយៗ ដែលមានស្នាដៃជាច្រើនសន្ធឹកសន្ធាប់បង្ហាញជូនដល់សិស្សានុសិស្ស លោកគ្រូ អ្នកគ្រូ មាតាបិតា ឬអ្នកអាណាព្យាបាលសិស្ស និងសាធារណជនដែលអញ្ជើញចូលរួមទស្សនា។
លោក បាននិយាយថា «សាលារៀនរបស់យើង ចង់ឱ្យសិស្សានុសិស្សទាំងអស់បានបញ្ចេញស្នាដៃរបស់គាត់ ក្រៅពីការអនុវត្តជាក់ស្តែងនៅក្នុងបន្ទប់ពិសោធន៍ ការសិក្សាទ្រឹស្តីនៅក្នុងថ្នាក់ ដែលរួមមានមុខវិជ្ជាគណិត រូប គីមីវិទ្យា ជីវៈ ផែនដី ចឹងគាត់មានឱកាសជាមួយនឹងក្រុមការងារគាត់ហ្នឹង គាត់អនុវត្តន៍ជាក់ស្តែងនៅខាងក្រៅដើម្បីធ្វើការប្រកួតប្រជែងយកចំណាត់ថ្នាក់លេខ១។»
លោក បន្ថែមថា សាលារៀន ក៏មានរៀបចំកម្មវិធីមួយទៀត គឺការប្រកួតគូរគំនូរក្រោមប្រធានបទស្តីពី «កុមារ និងធម្មជាតិ» ហើយក្នុងដំណើរការនៃការប្រកួតប្រជែងគូរគំនូរនេះ បានប្រព្រឹត្តទៅដោយគណៈគ្រប់គ្រងសាលាបានបែងចែកសិស្សជាក្រុមៗ ហើយឱ្យក្រុមនីមួយៗជ្រើសរើសរូបភាពសម្រាប់យកគូរដោយខ្លួនឯងដោយគោរពតាមប្រធានបទដែលបានកំណត់។
«សកម្មភាពនេះបានបង្ហាញឱ្យឃើញពីស្មារតីសាមគ្គីភាព សហការ ដឹកនាំ និងឯករាជ្យក្នុងការធ្វើការងារជាក្រុម ជាពិសេសវាជាពេលវេលាមួយដែលធ្វើឱ្យពួកគេអាចរឹតបន្តឹងចំណងមិត្តភាពរបស់ពួកគេបានកាន់តែល្អប្រសើរជាមួយមិត្តរួមថ្នាក់ក៏ដូចជាមិត្តរួមជំនាន់។» នេះបើតាមការបញ្ជាក់របស់លោក ជា សម្បត្តិ នាយកចាងហ្វាង នៃសាលារៀន អន្តរទ្វីប អាមេរិកាំង សាខាទួលគោក។
គួរជម្រាបជូនថា កម្មវិធីប្រកួតគូរគំនូរ និងតាំងពិព័រណ៍ស្នាដៃសិស្សលើកទី១៤នេះ នឹងប្រព្រឹត្តិទៅនៅសៅរ៍ថ្ងៃទី២ ខែកក្កដា ឆ្នាំ២០២២ ចាប់ផ្តើមពីម៉ោង៧និង០០នាទីព្រឹក ដល់ម៉ោង៤និង០០នាទីរសៀល នៃមជ្ឈមណ្ឌលភាសា អេ អាយ អាយ និងសាលារៀន អន្តរទ្វីប អាមេរិកាំង សាខាចាក់អង្រែ ដែលមានទីតាំងនៅតាមបណ្តោយផ្លូវជាតិលេខ២ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ៕
