គ្រឹះស្ថានអប់រំរបស់អ្នកឧកញ៉ា គួច ម៉េងលី បង្កើតព្រឹត្តិការណ៍រត់ប្រណាំងក្នុងបុព្វហេតុសប្បុរសធម៌
លោកស្រី រស់ យ៉ាណា ប្រធាននៃសាលារៀន អន្តរទ្វីប អាមេរិកាំង បានមានប្រសាសន៍យ៉ាងដូច្នេះ៖ « យើងនៅតែជឿជាក់ថា កិច្ចការងារសង្គមជាកិច្ចការមួយដែលជាកាតព្វកិច្ចរបស់យើងទាំងអស់គ្នាក្នុងនាមជាពលរដ្ឋរួមសង្គមជាមួយគ្នាក្នុងការចូលរួមតិចច្រើនក្តី ដើម្បីធ្វើឱ្យការងារសង្គមរបស់ពួកយើងកាន់តែអស្ចារ្យ កាន់តែមានការចូលរួមចំណែក ហើយពួកយើងសង្ឃឹមថា វត្តមានរបស់ពួកយើងនៅខេត្តតាកែវនឹងទទួលបានការគាំទ្រច្រើនពីសំណាក់អ្នកអាណាព្យាបាល អ្នកសិក្សាក្នុងការគាំទ្រទៅលើកិច្ចការងារនៅក្នុងវិស័យអប់រំ។»
លោក រឿង សុភាព អនុប្រធាន នៃសាលារៀន អន្តរទ្វីប អាមេរិកាំង បានមានប្រសាសន៍ថា សកម្មភាពនេះ គឺផ្តល់ឱកាសដ៏មានអត្ថន័យបំផុតសម្រាប់អ្នកចូលរួមទាំងអស់ ពីព្រោះពួកគេបានរួមចំណែកគាំទ្រដល់សកម្មភាពសប្បុរសធម៌ក្នុងខេត្តតាកែវ ហើយទន្ទឹមនឹងនេះដែរ អ្នកចូលរួមក៏នឹងទទួលបាននូវបទពិសោធន៍ដ៏រីករាយ និងអនុស្សាវរីយ៍ដែលមិនអាចបំភ្លេចបានជាមួយក្រុមគ្រួសារ និងមិត្តភក្តិជាទីស្រឡាញ់។
លោកបញ្ជាក់ថា ចំពោះកម្មវិធីរត់ប្រណាំងនេះ សម្រាប់គោលដៅរត់ប្រណាំងយើងនឹងចេញដំណើរនៅពីមុខអគារមជ្ឈមណ្ឌលភាសា អេ អាយ អាយ និងសាលារៀន អន្តរទ្វីប អាមេរិកាំង សាខាខេត្តតាកែវ តាមផ្លូវជាតិលេខ២ រួចបត់ស្តាំតាមផ្លូវលេខ៣១ បន្តទៅផ្លូវក្រវាត់ក្រុង ហើយបត់ឆ្វេងទៅតាមផ្លូវជាតិលេខ២វិញ ដោយឆ្លងកាត់វិមានឯករាជ្យ ក្រុងដូនកែវ ហើយនឹងត្រូវបញ្ចប់ទីនៅពីមុខអគារមជ្ឈមណ្ឌលភាសា អេ អាយ អាយ និងសាលារៀន អន្តរទ្វីប អាមេរិកាំង សាខាខេត្តតាកែវ ដែលមានរយៈចម្ងាយ៣.៩ គីឡូម៉ែត្រ។ ក្នុងនោះ ថវិកាដែលទទួលបានពីការចូលរួមរបស់សប្បុរជននៅក្នុងកម្មវិធីរត់ប្រណាំងដើម្បីសប្បុរសធម៌មានចំនួនសរុប ២០០០ដុល្លារអាមេរិក។
លោក រឿង សុភាព បានឱ្យដឹងថា «ការចំណាយថវិកាក្នុងសកម្មភាពនេះ គឺជាការចូលរួមចំណែកជួយដល់អ្នកខ្វះខាតតាមទីជនបទ ក៏ដូចជាទិញសម្ភារសិក្សាជូនកុមារខ្វះខាតផងដែរ ព្រោះថវិកាដែលប្រមូលបានយើងនឹងប្រគល់ជូនមូលនិធិ ម៉េងលី ជេ. គួច ដើម្បីចូលរួមចំណែកក្នុងការងារសង្គម និងសប្បុរសធម៌ ជាពិសេសដើម្បីសុខភាពយើងទាំងអស់គ្នា។»
លោកបានបន្ថែមថា ជ័យលាភីនៃការរត់ប្រណាំងចំណាត់ថ្នាក់លេខ១ នឹងទទួលបានមេដាយមាស១គ្រឿង និងវត្ថុអនុស្សាវរីយ៍។ ដោយឡែក ចំណាត់ថ្នាក់លេខ២ មេដាយប្រាក់១គ្រឿង និងវត្ថុអនុស្សាវរីយ៍ និងចំណាត់ថ្នាក់លេខ៣ មេដាយសំរឹទ្ធិ១គ្រឿង និងវត្ថុអនុស្សាវរីយ៍ជាច្រើនទៀត។
លោកអនុប្រធានសាលាសង្កត់ធ្ងន់ថា ព្រឹត្តិការណ៍នេះមានគោលបំណងលើកកម្ពស់សុខភាពផ្តល់ភាពសប្បាយរីករាយដល់អ្នកចូលរួម ហើយអ្វីដែលកាន់តែពិសេសទៀតនោះ គឺដើម្បីបុព្វហេតុសប្បុរសធម៌ ហើយក៏សូមអរគុណដល់អាជ្ញាធរដែនដីដែលបានគាំទ្រ និងសហការក្នុងការរៀបចំកម្មវិធីឱ្យដំណើរការទៅបានយ៉ាងរលូនផងដែរ។
បេក្ខជនទទួលបានជ័យលាភីលេខ១ កញ្ញា ពេជ្រ សុវណ្ណនូ និងយុវតី ហ៊ាង ច័ន្ទសុមនា បានលើកឡើងស្រដៀងគ្នាថា ខ្លួនពិតជាមានអារម្មណ៍រំភើប និងសប្បាយរីករាយជាខ្លាំងចំពោះជ័យលាភីប្រកួតរត់ម៉ារ៉ាតុង ដែលខ្លួនមិនដែលនឹកស្មានដល់នេះ ព្រមទាំងបានចាត់ទុកការប្រកួតបែបនេះថា ជាការប្រកួតដែលនាំមកនូវទាំងសុខភាព និងការចូលរួមចំណែកយ៉ាងផុសផុល ក៏ដូចជាការជួយទ្រទ្រង់ដល់សង្គមផងដែរ។
គួរបញ្ជាក់ថា កម្មវិធីសប្បុរសធម៌ ត្រូវបានបង្កើតឡើងដើម្បីចូលរួមចំណែកក្នុងការជំរុញលើកកម្ពស់វប្បធម៌ចែករំលែកក្នុងសង្គម ក៏ដូចជាផ្សារភ្ជាប់ការសិក្សារបស់សិស្សានុសិស្សទៅនឹងសហគមន៍។ រាល់ពេលមានការរៀបចំកម្មវិធី សាលារៀន អន្ដរទ្វីប អាមេរិកាំង តែងតែរៀបចំឱ្យសិស្សានុសិស្សមានសកម្មភាពស្ម័គ្រចិត្ដរួមគ្នាស្វែងរកនូវជំនួយសប្បុរសធម៌ ការកៀរគរនូវថវិកាសប្បុរសធម៌ពីសប្បុរសជននានាតាមរយៈការដាក់លក់នូវវត្ថុអនុស្សាវរីយ៍ និងនំចំណីផ្សេងៗ និងស្វាគមន៍ទទួលនូវជំនួយសម្ភារសប្បុរសធម៌ ដើម្បីយកទៅចែកជូនដល់កុមារកំព្រា ជនទុរគត ជនពិការ ជនក្រីក្រ ចាស់ជរា ទីវត្ដអារាម និងសាលារៀន ដែលមានភាពខ្វះខាតនៅតាមទីជនបទឆ្ងាយៗ ក្នុងគោលបំណងជួយសម្រាលទុក្ខលំបាករបស់ប្រជាពលរដ្ឋ និងការរួមចំណែកវប្បធម៌ចែករំលែកជាមួយរាជរដ្ឋាភិបាល៕
