មន្ទីរពេទ្យ​បង្អែក​ខេត្ត​ ​អះអាង​ថា​ ​ការ​ស្លាប់​វេជ្ជបណ្ឌិត​ ស៊ា​ង​ ​តុលា​ ​មិន​ពាក់ព័ន្ធ​ការ​ចាក់​វ៉ាក់សាំង​កូ​វី​ដ​ទេ​

ថ្នាក់​ដឹកនាំ​មន្ទីរពេទ្យ​ខេត្ត​សៀមរាប​បាន​បំភ្លឺ​ថា​ ​ការ​ស្លាប់​របស់​វេជ្ជបណ្ឌិត​ ស៊ា​ង​ ​តុលា​ ​ម​ន្រ្តី​បម្រើ​ការ​នៅ​ផ្នែក​ពិគ្រោះ​ជំងឺ​ក្រៅ​ ​និង​សង្គ្រោះ​បន្ទាន់​ដំបូង​នៃ​មន្ទីរពេទ្យ​បង្អែក​ខេត្ត​សៀមរាប​ ​គឺ​មិន​មានការ​ពាក់ព័ន្ធ​នឹង​ការ​ចាក់​វ៉ាក់សាំង​បង្ការ​ជំងឺ​កូ​វី​ដ​១​៩​នោះ​ទេ​។​

​ក្នុង​លិខិត​ស្រាយ​បំភ្លឺ​ ​នៅ​ថ្ងៃ​ទី​២​ ​ខែ​មីនា​ ​ឆ្នាំ​២​០​២​១​ ​បញ្ជាក់​ថា​ ​វេជ្ជបណ្ឌិត​ ស៊ា​ង​ ​តុលា​ ​បាន​បាត់បង់ជីវិត​ដោយ​បញ្ហា​សរសៃឈាម​បេះដូង​ ​និង​មិន​មាន​ជាប់​ពាក់ព័ន្ធ​នឹង​ការ​ចាក់​វ៉ាក់សាំង​បង្ការ​កូ​វី​ដ​១​៩​ទេ​។​ ​ការ​បញ្ជាក់​នេះ​ធ្វើឡើង​បន្ទាប់ពី​មានការ​វាយ​តម្លៃ​របស់​ថ្នាក់​ដឹកនាំ​មន្ទីរពេទ្យ​និង​ក្រុម​គ្រូពេទ្យ​។​

​សូម​ជម្រាប​ជូន​ថា​ ​វេជ្ជបណ្ឌិត​ ស៊ា​ង​ ​តុលា​ ​ភេទប្រុស​ ​អាយុ​៣​៩​ឆ្នាំ​ ​មាន​ទីលំនៅ​ភូមិ​ថ្មី​ ​សង្កាត់​ស្វាយ​ដ​ង្គំ ​ក្រុង​សៀមរាប​ ​ជា​មន្ត្រី​នៅ​ផ្នែក​ពិគ្រោះ​ជំងឺ​ក្រៅ​ ​និង​ស​ង្រ្គោះ​បន្ទាន់​ដំបូង​ ​នៃ​មន្ទីរពេទ្យ​បង្អែក​ខេត្ត​សៀមរាប​។​ ​លោក​បាន​ទទួល​មរណភាព​នៅ​ក្នុង​លំនៅ​ដ្ឋា​ន​ ​ប្រហែល​ម៉ោង​៤​ទៀបភ្លឺ​ ​ថ្ងៃ​ទី​២​ ​ខែ​មីនា​ ​ឆ្នាំ​២​០​២​១​។​

​ក្នុង​លិខិត​ដដែល​បន្ត​ថា​ ​វេជ្ជបណ្ឌិត​ ស៊ា​ង​ ​តុលា​ ​បាន​បំ​ពេញការ​ងារ​ជា​ធម្មតា​ ​គឺ​បាន​មក​ប្រជុំ​ពេលព្រឹក​ ​និង​បាន​ពិនិត្យ​ព្យាបាល​ជំងឺ​ដូចសព្វដង​។​ ​រហូត​វេលា​ម៉ោង​ ​៣​រសៀល​ ​លោក​បាន​ស្ម័គ្រចិត្ត​ទៅ​ចាក់​វ៉ាក់សាំង​ការពារ​កូ​វី​ដ​១​៩​ (​Sin​o​p​h​or​m​) ​នៅ​ក្នុង​មន្ទីរពេទ្យ​បង្អែក​ខេត្ត​សៀមរាប​។​ ​ការពិនិត្យ​និង​វាយ​តម្លៃ​មុន​ចាក់​របស់​មន្ត្រី​បម្រើ​ការ​នៅកន្លែង​ចាក់​វ៉ាក់សាំង​ឃើញ​ថា​ ​លោក​ពុំ​មាន​បញ្ហា​ដែល​ត្រូវ​ហាម​ចាក់​វ៉ាក់សាំង​ទេ​។​

​បន្ទាប់ពី​ចាក់​រួច​ ​លោក​វេជ្ជបណ្ឌិត​ ស៊ា​ង​ ​តុលា​ ​បាន​គោរព​តាម​គោលការណ៍​ដោយ​សម្រាក​ឱ្យ​មន្ត្រី​ជំនាញ​តាមដាន​ ​៣​០​នាទី​ ​បន្ទាប់ពី​មក​ដោយសារ​ពុំ​មានផល​រំខាន​ ​និង​បញ្ហា​អ្វី​ដែល​កើតមានឡើង​ ​លោក​ក៏​ត្រឡប់មក​បន្ត​ការងារ​ជា​ធម្មតា​រហូតដល់​ម៉ោង​៥​រសៀល​ ​ទើប​លោក​បាន​បើករថយន្ត​ចេញទៅ​យកប្រពន្ធ​របស់​លោក​ ​ដែល​បម្រើ​ការ​នៅ​មន្ទីរពេទ្យ​កុមារ​អង្គរ​ ​រួច​បន្ត​យកកូន​នៅ​សាលារៀន​មក​គេហដ្ឋាន​របស់​ខ្លួន​ ​រួច​លោក​ក៏​ត្រឡប់មក​ធ្វើការ​នៅ​មន្ទីរពេទ្យ​បង្អែក​វិញ​រហូតដល់​ម៉ោង​៨​យប់​ ​ទើប​ត្រឡប់ទៅ​សម្រាក​នៅ​ឯ​ផ្ទះ​វិញ​។​

​បើ​តាម​ប្រពន្ធ​ជនរងគ្រោះ​ ​និង​មិត្តភក្តិ​របស់​លោក​ ​បាន​បញ្ជាក់​ថា​ ​វេជ្ជបណ្ឌិត​ ស៊ា​ង​ ​តុលា​ ​មាន​បញ្ហា​ថប់ដង្ហើម​នៅ​ពេលដេក​ ​និង​មាន​ស្រមុក​ខ្លាំង​ ​ពិសេស​១​ស​ប្តាហ៍​ចុងក្រោយ​នេះ​ ​ព្រមទាំង​មាន​ប្រវត្តិ​ឈឺ​ទ្រូង​ ​និង​ឧ​ស្សាហ៍​ពិនិត្យ​អគ្គិសនី​បេះដូង​ជា​ញឹកញាប់​ផង​ដែរ​។​

​ប្រពន្ធ​ ​របស់​លោក​បន្ត​ថា​ ​នៅ​យប់​ថ្ងៃ​ទី​១​ ​ខែ​មីនា​ ​ឆ្នាំ​២​០​២​១​ ​បន្ទាប់ពី​លោក​ត្រឡប់​ពី​មន្ទីរពេទ្យ​ទៅវិញ​ ​បាន​បរិភោគអាហារ​ជុំ​គ្រួសារ​ជា​ធម្មតា​ ​ហើយ​មុន​ពេល​ចូល​សម្រាក​លោក​បាន​ត្អូញ​ថា​ ​ឈឺ​ទ្រូង​និង​អស់កម្លាំង​ដោយសារ​មិនសូវ​បាន​សម្រាក​។​

​នៅ​វេលា​ម៉ោងជាង​៣​ទៀបភ្លឺ​ ​ឈាន​ចូល​ថ្ងៃ​ទី​២​ ​ខែ​មីនា​ ​ឆ្នាំ​២​០​២​១​ ​លោក​វេជ្ជបណ្ឌិត​ ស៊ា​ង​ ​តុលា​ ​ស្ថិតនៅ​ក្នុង​សភាព​សន្លប់​និង​គាំ​ដង្ហើម​ម្តងៗ​ ​ឃើញ​សភាព​ដូច្នេះ​ប្រពន្ធ​លោក​បាន​ធ្វើ​ការសង្គ្រោះ​បេះដូង​ ​និង​ផ្លូវ​ដង្ហើម​ ​ព្រមទាំង​បាន​ទាក់ទង​ទៅ​មិត្តភក្តិ​លោក​ម្នាក់​ជា​វេជ្ជបណ្ឌិត​មក​ជួយ​ស​ង្រ្គោះ​ជា​បន្ត​ ​បន្ទាប់ពី​បាន​ជួយសង្គ្រោះ​មិនបាន​ជោគជ័យ​ ​មិត្តភក្តិ​លោក​បាន​ផ្តល់​ព័ត៌មាន​មក​ថ្នាក់​ដឹកនាំ​មន្ទីរពេទ្យ​ ​រួច​សម្រេច​បញ្ជូន​លោក​ទៅ​មន្ទីរពេទ្យ​តាម​រថយន្ត​សង្គ្រោះ​មកដល់​មន្ទីរពេទ្យ​ ​បង្អែក​ខេត្ត​សៀមរាប​ ​និង​បាន​មកដល់​វេលា​ម៉ោង​៤​៖​៤​៥​នាទី​ទៀបភ្លឺ​​។​ ​ក្នុងកំលុង​ពេល​នៃ​ការបញ្ជូន​មក​មន្ទីរពេទ្យ​ ​ភរិយា​លោក​ ​និង​មិត្តភក្តិ​ដែល​សុទ្ធ​សឹង​ជាម​ន្រ្តី​សុខាភិបាល​ ​បាន​ជួយសង្គ្រោះ​បេះដូង​ ​និង​ផ្លូវ​ដង្ហើម​ជាប់​ជាប្រចាំ​ ​ប៉ុន្តែ​លោក​នៅ​មិនទាន់​ដឹងខ្លួន​ ​និង​មិន​មាន​ដង្ហើម​ ​និង​ចលនា​បេះដូង​ដដែល​។​

​តាម​ការ​វាយ​តម្លៃ​របស់​ថ្នាក់​ដឹកនាំ​មន្ទីរពេទ្យ​ ​និង​ក្រុម​គ្រូពេទ្យ​ ​បាន​អះអាង​ថា​ ​វេជ្ជបណ្ឌិត​ ស៊ា​ង​ ​តុលា​ ​បាន​បាត់បង់ជីវិត​ ​មុន​ពេល​មកដល់​មន្ទីរពេទ្យ​ទៅទៀត​៕​
​