យ៉ាងហោចណាស់​មនុស្ស​ស្លាប់​៤​ ​និង​របួស​៩​ ​ក្នុង​គ្រោះថ្នាក់​ចរាចរណ៍​ទូទាំង​ប្រទេស​ម្សិលមិញ​

កុំ​បើកបរ​លើស​ល្បឿន​កំណត់​! ​យ៉ាងហោចណាស់​មនុស្ស​ស្លាប់​៤​នាក់​ ​និង​របួសធ្ងន់​ស្រាល​៩​នាក់​ ​ក្នុង​ករណី​គ្រោះថ្នាក់​ចរាចរណ៍​ផ្លូវគោក​ទូទាំង​ប្រទេស​ ​នៅ​ថ្ងៃ​ទី​២​៥​ ​ខែកុម្ភៈ​ ​ឆ្នាំ​២​០​២​១​ ​ម្សិលមិញ​។​ ​នេះ​បើ​តាម​របាយការណ៍​របស់​អគ្គ​ស្នងការដ្ឋាន​នគរបាល​ជាតិ​ ​ដែល​ធ្វើ​បច្ចុប្បន្នភាព​ករណី​គ្រោះថ្នាក់​ចរាចរណ៍​ជាប្រចាំ​។​

​ក្នុង​របាយការណ៍​អគ្គ​ស្នងការដ្ឋាន​នគរបាល​ជាតិ​ដដែល​ ​សង្កត់ធ្ងន់​ថា​ ​ករណី​គ្រោះថ្នាក់​ចរាចរណ៍​ផ្លូវគោក​ទូទាំង​ប្រទេស​ ​ដែល​បង្ក​ឱ្យ​មាន​មនុស្ស​ស្លាប់​ ​និង​របួស​សរុប​ចំនួន​១​៣​នាក់​ ​គឺ​កើតឡើង​ដោយសារ​ការ​ប៉ះទង្គិច​គ្នា​ចំនួន​៨​លើក​ ​និង​បណ្តាលមកពី​ល្បឿន​ ​មិន​ប្រកាន់​ស្តាំ​ ​មិន​គោរព​សិទ្ធិ​ ​បត់​គ្រោះថ្នាក់​ ​ប្រជែង​ ​និង​កត្តា​យាន​៕​
​