អត្ថបទ៖វឿន ពិសី
នៅថ្ងៃទី១៩ ខែមករា ឆ្នាំ២០២១ អង្គភាពសារព័ត៌មាន The Intercon Rooster ទទួលបានសេចក្ដីជូនដំណឹងពីសាលារៀន អន្តរទ្វីប អាមេរិកាំង ដោយប្រកាសជ្រើសរើសសិស្សានុសិស្សគ្រប់សាខារបស់ខ្លួន ដើម្បីចូលរួមប្រកួតនិទានរឿងជាភាសាអង់គ្លេស ពានរង្វាន់ ម៉េងលី ជេ. គួច រដូវកាលទី៣ ប្រចាំឆ្នាំ២០២១។
បើតាមសាលារៀន អន្តរទ្វីប អាមេរិកាំង បានបញ្ជាក់ថា សម្រាប់ការប្រកួតដណ្ដើមពានរង្វាន់លើកនេះ ធ្វើឡើងសម្រាប់បេក្ខជនជាសិស្សបឋមសិក្សាថ្នាក់ភាសាអង់គ្លេស ចាប់ពីកម្រិត៣ឡើងទៅ ដោយវគ្គជម្រុះជុំទី១ នឹងប្រព្រឹត្តទៅនៅថ្ងៃទី២៧ ខែកុម្ភៈ ឆ្នាំ២០២១ ខាងមុខចាប់ពីម៉ោង៨:០០នាទីព្រឹក ដល់ម៉ោង១១:០០ នៅតាមសាខានីមួយៗ។ គ្រឹះស្ថានសិក្សាដដែលបន្ថែមថា សម្រាប់ការប្រកួតក្នុងវគ្គផ្តាច់ព្រ័ត្រ នឹងប្រព្រឹត្តទៅនៅថ្ងៃ២៧ ខែមីនា ឆ្នាំ២០២១ ចាប់ពីម៉ោង៨:00នាទី ដល់ម៉ោង១១:00ព្រឹក នៅសាលប្រជុំ សូវ ហុងគុយ អគារ លីម គីម ណយ នៃសាលារៀន អន្តរទ្វីប អាមេរិកាំង សាខាម៉ៅសេទុង។
សូមជម្រាបថា ការប្រកួតពានរង្វាន់និទានរឿងជាភាសាអង់គ្លេស ម៉េងលី ជេ. គួច នេះ សម្រាប់បេក្ខជនដែលមានសមត្ថភាពដណ្ដើមបានជ័យលាភីលេខ១ នឹងទទួលបានអាហារូបករណ៍៧៥% ពានរង្វាន់ បណ្ណសរសើរ និងវត្ថុអនុស្សាវរីយ៍។ សម្រាប់ជ័យលាភីលេខ២ នឹងទទួលបានអាហារូបករណ៍៥០% ពានរង្វាន់ បណ្ណសរសើរ និងវត្ថុអនុស្សាវរីយ៍ និងលេខ៣ ទទួលបានអាហារូបករណ៍២៥% ពានរង្វាន់ បណ្ណសរសើរ និងវត្ថុអនុស្សាវរីយ៍។ នេះបើតាមការបញ្ជាក់ពីសាលារៀន អន្តរទ្វីប អាមេរិកាំង។
សម្រាប់ការចុះឈ្មោះប្រកួតប្រជែងពានរង្វានប្រចាំឆ្នាំ២០២១នេះ ចាប់ផ្ដើមទទួលចុះឈ្មោះពីថ្ងៃនេះតទៅ រហូតដល់ថ្ងៃទី៨ ខែកុម្ភៈ ឆ្នាំ២០២១ នៅតាមការិយាល័យកិច្ចការសិស្ស នៃអគារសិក្សារៀងៗខ្លួន៕
