លោក សាយ ណូរ៉ា ព្រះរាជអាជ្ញារងអមសាលាដំបូងរាជធានីភ្នំពេញ កាលពីថ្ងៃទី១ ខែធ្នូ ឆ្នាំ២០២០ ថ្មីៗនេះ បានសម្រេចចោទប្រកាន់លោក មាស សាវឿន អនុរដ្ឋលេខាធិការក្រសួងយុត្តិធម៌ និងលោក ឆែម ពេត អនុរដ្ឋលេខាធិការនៃទីស្តីការគណៈរដ្ឋមន្ត្រីពីបទ «ឆបោក» ពាក់ព័ន្ធការទិញលក់ដីទំហំ២ហិកតា នៅភូមិទួលសង្កែ សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។
យោងតាមដីកាសន្និដ្ឋានបញ្ជូនឱ្យស៊ើបសួរ ចុះថ្ងៃទី១ ខែធ្នូ ឆ្នាំ២០២០ ជនត្រូវចោទទាំង២នាក់ គឺលោក មាស សាវឿន និងលោក ឆែម ពេត ត្រូវដាក់ឱ្យស្ថិតក្រោមការចោទប្រកាន់ ដែលប្រព្រឹត្តកាលពីថ្ងៃទី២១ ខែតុលា ឆ្នាំ២០១៦ តាមមាត្រា៣៧៧ និងមាត្រា៣៧៨ នៃក្រមព្រហ្មទណ្ឌ។
ជុំវិញបញ្ហានេះ លោក ជិន ម៉ាលីន រដ្ឋលេខាធិការនិងជាអ្នកនាំពាក្យក្រសួងយុត្តិធម៌ ថ្លែងថា ជានីតិវិធីព្រះរាជអាជ្ញាត្រូវជូនដំណឹងស្តីពីការការចោទប្រកាន់ទៅកាន់ក្រសួងយុត្តិធម៌ ដែលជាស្ថាប័នសាម៉ី ហើយលោក មាស សាវឿន ត្រូវចូលរួមនីតិវិធី ដើម្បីការពារខ្លួនតាមផ្លូវច្បាប់ ដូចគេដូចឯងជាធម្មតា។
បើតាមលោក ជិន ម៉ាលីន ពេលនេះលោក មាស សាវឿន អនុរដ្ឋលេខាធិការក្រសួងយុត្តិធម៌ កំពុងបំពេញមុខងារនិងតួនាទីជាធម្មតា ដោយសារលោកត្រឹមជាជនសង្ស័យ ដោយពុំទាន់មានសាលក្រមផ្តន្ទាទោសនៅឡើយទេ។
លោក មាស សាវឿន ដែលជាអតីតអភិបាលរងខេត្តព្រះវិហារ ធ្លាប់បានរងការចោទប្រកាន់ថា បានរំលោភយកដីស្របច្បាប់របស់លោកស្រី លឹម វណ្ណា ស្ថិតនៅក្នុងតំបន់អភិវឌ្ឍន៍ឫស្សីកែវ ភូមិទួលពពែ សង្កាត់ទួលសង្កែទី២ ខណ្ឌឫស្សីកែវ រាជធានីភ្នំពេញ៕
