នៅមិនប៉ុន្មានថ្ងៃទៀតនោះទេ ខួបគម្រប់១៦ឆ្នាំ នៃមជ្ឈមណ្ឌលភាសា អេ អាយ អាយ និងក្រុមហ៊ុន ម៉េងលី ជេ. គួច អេឌ្យូខេសិន នឹងចូលមកដល់ក្នុងពេលឆាប់ៗដ៏ខ្លីខាងមុខនេះ។
ក្នុងឱកាសខួបគម្រប់១៦ឆ្នាំ នៃភាពរីកចម្រើន និងពង្រីកសក្ដានុពលរបស់ខ្លួនយ៉ាងធំទូលំទូលាយនេះ ប្រធានមជ្ឈមណ្ឌលភាសា អេ អាយ អាយ លោក ឡាយ សុភា បានផ្ញើសារអបអរសាទរ និងថ្លែងអំណរអរគុណយ៉ាងក្រៃលែងចំពោះលោកគ្រូ អ្នកគ្រូ និងបុគ្គលិកគ្រប់ផ្នែកទាំងអស់ ដែលបានខិតខំយ៉ាងសស្រាក់សស្រាំបំផុត ដែលនាំឱ្យមជ្ឈមណ្ឌលភាសា អេ អាយ អាយ រីកចម្រើនទាំងអគារសិក្សា និងកំណើនសិស្សានុសិស្ស ព្រមទាំងមានភាពល្បីល្បាញទាំងថ្នាក់ជាតិ និងអន្តរជាតិ។
ក្នុងឱកាសនេះផងដែរ លោកក៏បានអរគុណជាអនេកបំផុតដល់អ្នកអាណាព្យាបាលសិស្ស សិស្សានុសិស្សគ្រប់សាខា នៃមជ្ឈមណ្ឌលភាសា អេ អាយ អាយ និងមហាជនគ្រប់ទិសទី ដែលជឿទុកចិត្ត និងគាំទ្រ ដល់គ្រឹះស្ថានសិក្សា ដែលផ្ដោតសំខាន់ទៅលើការបណ្ដុះបណ្ដាលភាសាអង់គ្លេស ភាសាចិន និងភាសាថៃ ប្រកបដោយគុណភាព ប្រសិទ្ធភាព ក្នុងការចូលរួមបណ្ដុះបណ្ដាលនូវធនធានមនុស្សនៅកម្ពុជា។
តាមរយៈសារជូនពរនេះ ប្រធានមជ្ឈមណ្ឌលភាសា អេ អាយ អាយ លោក ឡាយ សុភា ក៏បានប្រសិទ្ធពរជ័យជូនចំពោះលោកឧកញ៉ា វេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន និង មជ្ឈមណ្ឌលភាសា អេ អាយ អាយ ថ្នាក់ដឹកនាំ លោកគ្រូ អ្នកគ្រូ អ្នកអាណាព្យាបាល សិស្សានុសិស្ស ព្រមទាំងមហាជនទូទៅ សូមប្រកបដោយសុខភាពល្អបរិបូរណ៍ អាយុយឺនយូរ កម្លាំងខ្លាំងក្លា ប្រាជ្ញាឈ្លាសវៃ និងមានសុភមង្គលគ្រប់ក្រុមគ្រួសារ។
មជ្ឈមណ្ឌលភាសា អេ អាយ អាយ ជាបុត្រសម្ពន្ធដ៏រឹងមាំជាមួយនឹងសាលារៀន អន្តរទ្វីប អាមេរិកាំង ក្រោមដំបូលនៃក្រុមហ៊ុន ម៉េងលី ជេ. គួច អេឌ្យូខេសិន ដែលមាន៦សាខាធំៗនៅក្នុងរាជធានីភ្នំពេញ។ ក្នុងនោះមានមជ្ឈមណ្ឌលភាសា អេ អាយ អាយ និងសាលារៀន អន្តរទ្វីប អាមេរិកាំង សាខាម៉ៅសេទុង ទួលគោក ចាក់អង្រែ ចោមចៅ ផ្សារថ្មី និងមជ្ឈមណ្ឌលភាសា អេ អាយ អាយ និងសាលារៀន អន្តរទ្វីប អាមេរិកាំង សាខាជ្រោយចង្វារ។
ក្នុងឱកាសខួបគម្រប់១៦ឆ្នាំរបស់ខ្លួននេះ មជ្ឈមណ្ឌលភាសា អេ អាយ អាយ បានផ្ដល់អាហារូបករណ៍រហូតដល់៥០ភាគរយសម្រាប់សិស្សដែលមកចុះឈ្មោះ៤នាក់ដំណាលគ្នា និង៣៥ភាគរយសម្រាប់ការចុះឈ្មោះ៣នាក់ដំណាលគ្នា ព្រមទាំង២៥ភាគរយសម្រាប់សិស្សដែលចុះឈ្មោះ២នាក់ក្នុងពេលតែមួយ។ អាហារូបករណ៍នេះ ផ្ដល់សម្រាប់តែសិស្សានុសិស្សដែលមកចុះឈ្មោះចូលសិក្សានៅសាខាចោមចៅ ផ្សារថ្មី និងសាខាជ្រោយចង្វារប៉ុណ្ណោះ។ ដោយឡែកសិស្សានុសិស្សដែលមកចុះឈ្មោះនៅសាខាម៉ៅសេទុង ទួលគោក និងសាខាចាក់អង្រែ ក៏នឹងទទួលអាហារូបករណ៍រហូតទៅដល់៣០ភាគរយ សម្រាប់សិស្សដែលមកចុះឈ្មោះ៤នាក់ដំណាលគ្នា និង២៥ភាគរយសម្រាប់ការចុះឈ្មោះ៣នាក់ដំណាលគ្នា ព្រមទាំង២០ភាគរយសម្រាប់សិស្សានុសិស្សដែលមកចុះឈ្មោះ២នាក់ជាមួយគ្នា។
គួររម្លឹកថា មជ្ឈមណ្ឌលភាសា អេ អាយ អាយ និងក្រុមហ៊ុន ម៉េងលី ជេ.គួច អេឌ្យូខេសិន ត្រូវបានបង្កើតឡើងដោយលោកឧកញ៉ា វេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សា និងអគ្គនាយកប្រតិបត្តិ កាលពីថ្ងៃទី២១ ខែមករា ឆ្នាំ២០០៥ រហូតដល់ថ្ងៃទី២១ ខែមករា ឆ្នាំ២០២១ ខាងនេះ មានអាយុកាល១៦ឆ្នាំ ដែលបានចូលរួមបណ្ដុះបណ្ដាលធនធានមនុស្សប្រកបដោយគុណភាព ប្រសិទ្ធភាព និងប្រកបដោយសក្ដានុពលខ្ពស់ ជាមួយរាជរដ្ឋាភិបាលកម្ពុជា៕
