អត្ថបទ៖ វឿន ពិសី
សេវាកម្មដឹកជញ្ជូន អន្តរទ្វីប បានត្រៀមរួចរាល់ក្នុងការផ្តល់សេវាកម្មដឹកជញ្ជូនសិស្សានុសិស្ស នៃមជ្ឈមណ្ឌលភាសា អេ អាយ អាយ (Aii) និងសាលារៀន អន្តរទ្វីប អាមេរិកកាំង (AIS) ឡើងវិញ នៅដើមខែវិច្ឆិកាខាងមុខ ដោយអនុវត្តន៍តាមគោលការណ៍ប្រតិបត្តិស្តង់ដាក្នុងបរិបទជំងឺកូវីដ-១៩ របស់ក្រសួងអប់រំ យុវជន និងកីឡា ដើម្បីការពារ និងទប់ស្កាត់ការរីករាលដាលនៃជំងឺកូវីដ-១៩។
លោក ហុង ខុនសុខរក្សា អនុប្រធានសេវាកម្មដឹកជញ្ជូន អន្តរទ្វីប បានឱ្យដឹងថា ការត្រៀមបើកដំណើរការសេវាកម្មរថយន្តដឹកសិស្សឡើងវិញ បន្ទាប់ពីក្រសួងអប់រំ យុវជន និងកីឡា អនុញ្ញាតឱ្យសេវារថយន្តដឹកសិស្ស បណ្ណាល័យ សកម្មភាពអប់រំកាយ និងកីឡា ព្រមទាំងសេវាអាហារដ្ឋាននៅតាមគ្រឹះស្ថានសិក្សាឯកជនបើកដំណើរការឡើងវិញ។
លោកបន្តថា បន្ទាប់ពីជំងឺកូវិដ១៩ បានរីករាលដាលអស់រយៈពេលប្រមាណប្រហែលជិតមួយឆ្នាំហើយ សេវាកម្មដឹកជញ្ជូន អន្តរទ្វីប ត្រូវជាប់គាំង ហើយអាចបើកដំណើរការឡើវិញ ដោយអ្នកបើកបរទាំងអស់ត្រូវត្រៀមខ្លួនគោរពឱ្យបានមួយរយភាគតាមគោលការណ៍ SOP ដែលក្រសួងអប់រំបានកំណត់ ដូចជាតាមឡានត្រូវមាន ម៉ាស៊ីនវាស់កម្ដៅ ទឹកអាលកុល (គ្រប់សិស្សមុននិងឡើងរថយន្តត្រូវវាស់កម្ដៅ និងលាងអាកុលជាមុនសិន) ក្នុងរថយន្តតម្រូវឱ្យមាន ស្គុតបិតគំលាតអង្គុយ អនុវត្តន៍នូវគោលការណ៍កំណត់ចំនួនសិស្សជិះឡានសាលា អ្នកបើកបរ និងសិស្សានុសិស្សជិះក្នុងរថយន្តត្រូវតែពាក់ម៉ាស់ទាំងអស់គ្នា ហើយត្រូវដុសលាងសម្អាតឡាន រក្សាអនាម័យ សោភ័ណ្ឌភាព ជាប្រចាំ។
លោក ហុង ខុនសុខរក្សា សេវាកម្មដឹកជញ្ជូនអន្តរទ្វីប គឺជាបុត្រសម្ពន្ធមួយរបស់ក្រុមហ៊ុន ម៉េងលី ជេ. គួច អេឌ្យូខេសិន ដែលមានសេវាឈានមុខគេ ប្រកបដោយសុវត្ថិភាពខ្ពស់ និងផាសុកភាព។ សព្វថ្ងៃសាលារៀន អន្តរទ្វីប អាមេរិ កាំង មានរថយន្តសរុបចំនួន៥៥គ្រឿង សម្រាប់ដឹកសិស្សានុសិស្សទាំង៦សាខា ក្នុងនោះមានរថយន្ត១៥កៅអីចំនួន៤៨គ្រឿង និងរថយន្ត២៥កៅអីមានចំនួន៧គ្រឿង។
លោកបញ្ជាក់ថា កំលុងពេលនេះ លោកបានបែបចែកជារថយន្តជាពីកម្រិតសម្រាប់ដឹកសិស្ស គឺ១៥កៅអីរៀបចំដាក់សិស្សានុសិស្សចំនួន៩នាក់ ឯរថយន្ត២៥កៅអីសម្រាប់សិស្សតែ១៧នាក់ តាមគោរពតាមគោលការណ៍ SOP របស់ក្រសួងដែលបានកំណត់។
សេវាកម្មដឹកជញ្ជូន អន្តរទ្វីប មានបម្រើសេវាកម្មជូនសិស្សានុសិស្សរបស់ខ្លួន នៅក្នុងតំបន់ជាច្រើនក្នុងរាជធានីភ្នំពេញ។ ក្នុងនោះរួមមានខណ្ឌចំការមន ខណ្ឌដូនពេញ ខណ្ឌមានជ័យ ខណ្ឌសែនសុខ ខណ្ឌ៧មករា ខណ្ឌទួលគោក ខណ្ឌពោធិ៍សែនជ័យ ខណ្ឌឫស្សីកែវ ខណ្ឌដង្កោ… និងបណ្ដាខេត្តក្បែររាជធានីភ្នំពេញ។ នេះបើតាមគណៈគ្រប់គ្រងនៃសេវាកម្មដឹកជញ្ជូនអន្តរទ្វីប។
លោក ង៉ែត រដ្ឋា អាយុ៣០ឆ្នាំ អ្នកបើករថយន្តនៅសេវាកម្មដឹកជញ្ជូន អន្តរទ្វីប បានសម្ដែងអារម្មណ៍រីករាយ ពេលដែលក្រសួងអប់រំអនុញ្ញាតឱ្យបើកដំណើរការឡើងវិញ។ លោកថា មុនចេញដឹកសិស្ស២០នាទី លោកត្រូវបោសជូត សម្អាតឡាន បាញ់អាកុល សម្លាប់មេរោគ ម៉ាស៊ីនត្រជាក់បើកត្រឹម២៤អង្សា។
លោកបន្តថា មុននឹងឱ្យសិស្សឡើងឡានតម្រូវឱ្យពាក់ម៉ាស់ វាស់កម្ដៅ លាងសម្អាតដៃជាមួយអាកុល ហើយបើសិស្សណាម្នាក់មានកម្ដៅក្ដៅខ្លាំង ឬផ្ដាសាយធំមិនអនុញ្ញាតឱ្យឡើងរថយន្តឡើយ។ បើតាមគោលការណ៍ក្រុមហ៊ុន លោកត្រូវដឹកសិស្សចំនួនបួនជើងក្នុងមួយថ្ងៃ គឺនៅពេលព្រឹក នៅផ្សារស្ទឹងមានជ័យ នៅពេលរសៀលពីផ្សារត្រពាំងថ្លឹងដល់ភូមិត្រពាំងថ្លឹង។
សូមជម្រាបជូនថា សេវាកម្មដឹកជញ្ជូនអន្តរទ្វីប នៃមជ្ឈមណ្ឌលភាសា អេ អាយ អាយ និងសាលារៀន អន្តរទ្វីប អាមេរិកាំង បម្រើសេវាកម្មដឹកជញ្ជូន ទាំង៦សាខា ទូទាំងរាជធានីភ្នំពេញ ចាប់ពីសិស្សថ្នាក់ក្រោមមត្តេយ្យ រហូតដល់ថ្នាក់ទី១២ តាមតម្រូវការរបស់មាតាបិតា និងអ្នកអាណាព្យាបាលសិស្ស៕
