លោកឧកញ៉ា វេជ្ជបណ្ឌិត គួច ម៉េងលី តាមរយៈមូលនិធិ ម៉េងលី ជេ. គួច នៅថ្ងៃទី១០ ខែសីហា កន្លងទៅ បានបរិច្ចាគអង្ករលើកទី២៣៦ ចំនួន១,៦៥០គីឡូក្រាមដល់បុគ្គលិកក្រុមហ៊ុន ម៉េងលី ជេ. គួច អេឌ្យូខេសិន ចំនួន៣៣គ្រួសារ ដើម្បីជួយសម្រួលដល់ជីវភាពរស់នៅប្រចាំថ្ងៃក្នុងកំលុងពេលជួបវិបត្តិដោយសារជំងឺកូវីដ១៩។
បើតាមក្រុមការងារមូលនិធិ ម៉េងលី ជេ. គួច បានបញ្ជាក់ថា ចាប់តាំងពីពាក់កណ្តាលខែមេសារហូតខែសីហា ឆ្នាំ២០២០នេះ លោកឧកញ៉ា វេជ្ជបណ្ឌិត គួច ម៉េងលី បានបរិច្ចាគអង្ករចំនួន៣៣,៣៥០គីឡូក្រាម និងត្រីខចំនួន១២,០២០កំប៉ុង ដល់បុគ្គលិកក្រុមហ៊ុន ម៉េងលី ជេ. គួច អេឌ្យូខេសិន ព្រមទាំងប្រជាពលរដ្ឋក្រីក្រមកពីឃុំបន្ទាយដែក ឃុំគគី សង្កាត់វាលស្បូវ ព្រះសង្ឃ អង្គការជនពិការ និងអង្គការកុមារកំព្រា ដោយមានអ្នកទទួលផលសរុបចំនួន២,២០៩គ្រួសារ។
ការផ្ដល់ជូននិងឧបត្ថម្ភនេះ ដើម្បីរួមចំណែកសម្រាលទុក្ខលំបាករបស់បុគ្គលិកនិងប្រជាពលរដ្ឋដែលរស់នៅតាមសហគមន៍នានាជាមួយនឹងរាជរដ្ឋាភិបាល ក្នុងកំលុងពេលដែលប្រទេសនានាលើពិភពលោក ក៏ដូចប្រទេសកម្ពុជាមានការរាតត្បាតនូវជំងឺកូវិដ-១៩ ដោយចំណាយថវិកាជិត៤០,០០០ដុល្លារអាមេរិក។
ក្រៅពីខ្វល់ខ្វាយចំពោះបុគ្គលិកនិងប្រជាពលរដ្ឋដែលមានជីវភាពខ្វះខាត លោកឧកញ៉ា វេជ្ជបណ្ឌិត គួច ម៉េងលី បានត្រៀមរួចជាស្រេចក្នុងការផ្ដល់ជូននូវថ្នាំសង្កូវ សេវាសង្គ្រោះ និងថែទាំសុខភាពដល់បុគ្គលិក ព្រមទាំងប្រជាពលរដ្ឋដែលងាយរងគ្រោះក្នុងកំលុងនេះ តាមរយៈវេជ្ជបណ្ឌិតជំនាញនៃមជ្ឈមណ្ឌល សុខភាពសិស្ស ម៉េងលី ជេ. គួច។
ជាមួយនឹងការឧបត្ថម្ភនិងផ្ដល់ជូននេះ លោកឧកញ៉ាតែងតែយកចិត្តទុកដាក់ខ្ពស់ក្នុងការបង្ការមេរោគផ្សេងៗ ដោយចាត់ឱ្យមានការបាញ់ថ្នាំសម្លាប់មេរោគ និងសត្វល្អិតចង្រៃទាំងក្នុងនិងក្រៅអគារសិក្សានៃមជ្ឈមណ្ឌលភាសា អេ អាយ អាយ និងសាលារៀន អន្តរទ្វីប អាមេរិកាំង ជាប្រចាំ។ ជាពិសេសបានអនុវត្តតាមការណែនាំរបស់ក្រសួងសុខាភិបាលនិងអង្គការសុខភាពពិភព ដូចជាការរក្សាគម្លាតពីគ្នា ការលាងសម្អាតដៃជាមួយអាល់កុល ការពាក់ម៉ាសការពារ ការអនាម័យខ្លួនប្រាណ ការឧស្សាហ៍លាងសម្អាតដៃជាមួយសាប៊ូ និងការបរិភោគនូវអាហារដែលមានជីវជាតិគ្រប់គ្រាន់ អាហារដែលមានវីតាមីនC ជាដើម ដើម្បីត្រៀមស្វាគមន៍សិស្សានុសិស្សចូលរៀន ក្រោយពេលដែលក្រសួងអប់រំអនុញ្ញាតឱ្យបើកសាលារៀនឡើងវិញក្នុងពេលខាងមុខ៕
