សាលារៀន អន្តរទ្វីប អាមេរិកាំង ជាគ្រឹះស្ថានអប់រំចំណេះទូទៅ ដែលផ្ដោតសំខាន់ទៅលើការបណ្ដុះបណ្ដាលចាប់ពីថ្នាក់ក្រោមមត្តេយ្យសិក្សា រហូតដល់មធ្យមសិក្សាទុតិយភូមិ បានប្រកាសផ្ដល់អាហារូបករណ៍១០០% ដល់សិស្សានុសិស្សសិក្សានៅសាកលវិទ្យាល័យបាងកក (Bangkok University International) ប្រទេសថៃ។
បើតាមសាលារៀន អន្តរទ្វីប អាមេរិកាំង បានឱ្យដឹងថា ការផ្ដល់ជូនអាហារូបករណ៍១០០% ដល់សិស្សានុសិស្សចំនួន២កន្លែងផ្សេងៗគ្នា។ ក្នុងនោះមានដូចជា៖
ទី១. លក្ខខណ្ឌជ្រើសរើសអាហារូបករណ៍១០០% ១កន្លែង សម្រាប់កម្មវិធី ASEAN Network Student 2020 ជាសិស្សានុសិស្សថ្នាក់ទី១២ នៃសាលារៀន អន្តរទ្វីប អាមេរិកាំង ដែលទទួលបានពិន្ទុកខ្ពស់ជាងគេ។ សិស្សម្នាក់ជ្រើសបានជំនាញ១ ក្នុងចំណោម៨ជំនាញ ដែលផ្ដល់ដោយសាកលវិទ្យាល័យ។ លើសពីនេះ សិស្សត្រូវមានឯកសារគ្រប់គ្រាន់តាមតម្រូវការរបស់សាកលវិទ្យាល័យ។
ទី២. លក្ខខណ្ឌជ្រើសរើសអាហារូបករណ៍១០០% ១កន្លែង សម្រាប់កម្មវិធី Global Bright Scholaship 2020 ជាសិស្សានុសិស្សថ្នាក់ទី១២ នៃសាលារៀន អន្តរទ្វីប អាមេរិកាំង ដែលមានកម្រិតជំនាញភាសាអង់គ្លេស ៦.០ ឬជំនាញមួយៗត្រូវលើសពី ៥.០។ សិស្សត្រូវមានលិខិតឧទ្ទេសនាមពីសាលា និងពីគោលបំណងរបស់ខ្លួន។ លើសពីនេះ សិស្សានុសិស្សត្រូវមានកំណត់ត្រាសិក្សាបានល្អប្រសើរ ថែមទាំងបានចូលរួមសកម្មភាពផ្សេងៗរបស់សាលា និងឆ្លងកាត់ការសម្ភាសតាមអនឡាញពីសាកលវិទ្យាល័យ។
សូមជម្រាបថា កម្មវិធីអាហារូបករណ៍ខាងលើនេះ ផុតកំណត់នៃការចុះឈ្មោះនឹងប្រព្រឹត្តិទៅនៅថ្ងៃទី២៤ ខែកក្កដា ឆ្នាំ២០២០ ខាងមុខនេះ។ នេះបើតាមសាលារៀន អន្តរទ្វីប អាមេរិកាំង៕
