អត្ថបទដោយក្លិបសិក្សាកាសែត AIS ៖ យុវជន វណ្ណៈ ណូបល ហ៊្សូលី, រ័ត្ន សុម៉ាលីពុទ្ធា និងយុវជន អាន ព្រីម៉ូ
ការប្រឹក្សាយោបល់ ជាការពិគ្រោះជជែកវែកញែកគ្នាឱ្យឃើញពីដំណើរការល្អ និងរកដំណោះស្រាយត្រឹមត្រូវណាមួយឱ្យបានជាក់ស្ដែង និងត្រឹមត្រូវតាមកាលៈទេសៈ។ ការប្រឹក្សាយោបល់នេះ ពិតជាមានសារៈសំខាន់ចំពោះសិស្ស និស្សិត ដែលកំពុងសិក្សា និងការរៀបចំផែនការ និងគោលដៅជីវិតឱ្យបានត្រឹមត្រូវទាំងពេលបច្ចុប្បន្ន និងអនាគត។
ជាទូទៅ អ្នកជំនាញតែងចាត់ទុកការប្រឹក្សាយោបល់នេះ ជាត្រីវិស័យមួយជួយស្វែងរកផ្លូវ ឬដំណោះស្រាយនៃបញ្ហានានា ដែលតែងកើតឡើងនៅចំពោះមុខឱ្យល្អប្រសើរ និងទទួលបានផ្លែផ្កាល្អ។ ក្នុងប្រទេសអភិវឌ្ឍភាគច្រើន យើងសង្កេតឃើញថា នៅតាមគ្រឹះស្ថានអប់រំ តែងមានវត្តមានក្លិបប្រឹក្សាយោបល់ជានិច្ច ដើម្បីរកដំណោះស្រាយរាល់បញ្ហា ឬឧបសគ្គនានា ដែលកើតឡើងចំពោះសិស្ស យុវជន ជាពិសេស ការប្រឹក្សានេះ រួមចំណែកយ៉ាងសំខាន់ក្នុងការអភិវឌ្ឍសមត្ថភាពចំណេះដឹង និងបទពិសោធក្នុងការសិក្សារៀនសូត្រ និងវិជ្ជាជីវៈក្នុងការរស់នៅប្រចាំថ្ងៃឱ្យកាន់តែរីកចម្រើន និងទូលំទូលាយ។
ទាក់ទិនបញ្ហានេះ បើតាមកញ្ញា លុយ វិបុល ជាអ្នកជំនាញ និងជាប្រធានអ្នកប្រឹក្សាយោបល់នៃសាលារៀន អន្ដរទ្វីប អាមេរិកាំង សាខាទួកគោក បានឱ្យដឹងថា ការប្រឹក្សារបស់អ្នកជំនាញទៅកាន់មនុស្សណាម្នាក់ គឺប្រៀបដូចជាអ្នកគាំទ្រខាងផ្លូវចិត្តរបស់បុគ្គលនោះ ដែលកំពុងមានបញ្ហានៅចំពោះ។
អ្នកជំនាញដដែលបន្ថែមថា នៅពេលដែលបុគ្គលម្នាក់មានបញ្ហាកើតឡើង បុគ្គលទាំងនោះ តែងសម្លឹងមើលឃើញស្ថានភាពខាងក្រៅ ប៉ុន្តែគាត់ហាក់មិនដឹងថា ស្ថានភាពខាងក្នុងរបស់គាត់នោះមានបញ្ហាអ្វីឡើយ។ ប្រធានអ្នកប្រឹក្សាយោបល់រូបនេះលើកជាឧទាហរណ៍ថា មានសិស្សមួយចំនួនគាត់មានអត្តចរឹតមិនសមរម្យ ឬអសីលធម៌ ហើយមានកាយវិការមិនសមរម្យចំពោះអ្នកគ្រូ លោកគ្រូ ឬមិត្តភក្កិរួមថ្នាក់ជាដើម។ ដូច្នេះ រាល់សិស្សដែលមានបញ្ហានេះ យើងគួរស្វែងយល់ពីឫសគល់នៃបញ្ហានោះជាមុនសិនថា តើហេតុការណ៍នេះកើតឡើងមកពីអ្វី? ហេតុអ្វីបានជាធ្វើឱ្យកើតឡើង? ជាពិសេស ត្រូវមើលបញ្ហាឱ្យឃើញបញ្ហា ហើយរួមចំណែកដោះស្រាយរាល់បញ្ហារបស់គាត់។ ពេលណាផ្លូវចិត្តយើងមានបញ្ហានោះ ផ្លូវកាយយើងក៏មានបញ្ហាទៅតាមនឹងដែរ ឬមួយក៏បង្ហាញនូវឥរិយាបថខុសប្លែកពីអ្វីដែលមានសព្វដងក៏មាន។
កញ្ញា វិបុល សង្កត់ធ្ងន់ថា «បច្ចុប្បន្ន បញ្ហាផ្លូវចិត្តរបស់យុវជនមួយចំនួនធំ គឺមានការប្រែប្រួលច្រើន ហាក់ខុសពីជំនាន់មុនៗ ហើយកំពុងតែវិវឌ្ឍន៍យ៉ាងខ្លាំង ដោយសារតែឥទ្ធិពលនៃបច្ចេកវិទ្យា និងបណ្ដាញសង្គម ដែលជះឥទ្ធិពលដល់ពួកគាត់។ ដូច្នេះ ពួកគាត់ត្រូវការពួកអ្នកប្រឹក្សាយោបល់ ដើម្បីធ្វើការពន្យល់ ណែនាំ បកស្រាយ និងតម្រង់ទិសដល់ពួកគាត់កុំឱ្យដើរលើផ្លូវខុស។ ជាពិសេស នៅពេលផ្លូវចិត្តរបស់ពួកគាត់មានសុខភាពល្អ នោះផ្លូវកាយរបស់ពួកគាត់ ក៏មានសុខភាពល្អ ដែលជាហេតុធ្វើឱ្យគាត់មានអារម្មណ៍ល្អក្នុងការសិក្សារៀនសូត្រ ឬប្រកបការងារ តែងទទួលបានផ្លែផ្កាល្អ និងជោគជ័យខ្ពស់»។
យុវសិស្ស សេង ស៊ីវហ្វុង សិស្សថ្នាក់ទី១១ នៃសាលារៀន អន្ដរទ្វីប អាមេរិកាំង សាខាទួលគោក បានប្រាប់ក្លិបសិក្សាកាសែត AIS ថា ចំពោះការប្រឹក្សាយោបល់នេះ ពិតជាផ្ដល់អត្ថប្រយោជន៍ជាច្រើនសម្រាប់យុវជនកម្ពុជា ជាពិសេសខ្លួនផ្ទាល់ក្នុងនាមជាសិស្សមួយរូប តែងទទួលបានការប្រឹក្សាយោបល់ពីសាលារៀនរបស់ខ្លួន។
ស៊ីវហ្វុង បន្តថា ការប្រឹក្សានេះ ក៏បានស្វែងរកផ្លូវដ៏ល្អមួយ ដែលជួយឱ្យខ្លួនមានការអភិវឌ្ឍទាំងសមត្ថភាពចំណេះដឹង ចំណេះធ្វើ និងបទពិសោធថ្មីៗ។ លើសពីនេះ ចេះដំណោះស្រាយលើបញ្ហាផ្សេងៗរួមទាំងបញ្ហាបុគ្គល បញ្ហាសុខភាពផ្លូវចិត្ត ជាដើម។
យុវតីដដែលថ្លែងពីចំណាប់អារម្មណ៍ថា «ការប្រឹក្សានេះ ខ្ញុំសង្ឃឹមយ៉ាងមុតមាំថា ទាំងសាលារៀនឯកជន និងសាលារដ្ឋនៅកម្ពុជា នឹងបង្កើនឱ្យមានក្លិបប្រឹក្សាយោបល់នេះឡើង ដើម្បីផ្ដល់នូវផលប្រយោជន៍ ដល់សិស្ស និស្សិត និងយុវជនកម្ពុជា ឱ្យកាន់តែប្រសើរនាសម័យវិទ្យាសាស្ត្រទំនើប»។
