អត្ថបទដោយក្លិបសិក្សាកាសែត AIS ៖ យុវសិស្ស ទៀ ភិចជឺ, វឌ្ឍនៈ ច័ន្ទសុវិសុទ្, ស៊ីម សេនឌី, គឹម សុខកញ្ញា និងយុវសិស្ស ម៉ា កញ្ញារីយ៍
ការកំណត់គោលដៅរបស់មនុស្សម្នាក់ៗមានឥទ្ធិពលយ៉ាងខ្លាំងក្លាចំពោះជីវិតរបស់ពួកគេ វាអាចជួយផ្លាស់ប្តូរការរស់នៅប្រចាំថ្ងៃ ក៏ដូចជាការធ្វើឱ្យជីវិតមនុស្សមានភាពល្អប្រសើរជាង មុន។ ការរៀបចំគោលដៅមិនមែននិយាយតែមាត់ មិនអនុវត្តនោះទេ ហើយក៏មិនមែនចេះតែអនុវត្តផ្តេសផ្តាស មិនមានការគិតពិចារណាបានដែរ បើពុំនោះទេវានឹងធ្វើឱ្យប៉ះពាល់ដល់អនាគតរបស់យើងវិញ។
ដើម្បីទទួលបានភាពជោគជ័យក្នុងការរៀបចំគោលដៅយើងត្រូវអនុវត្តនូវជំហានមួយចំនួនដូចជា៖
១. ដឹងពីចំណង់ចំណូលចិត្ត និងភាពប៉ិនប្រសប់របស់ខ្លួន : ការដឹងច្បាស់ពីជំនាញដែលខ្លួនចូលចិត្ត និងភាពប៉ិនប្រសប់ជាកត្តាសំខាន់ចាំបាច់ជាងគេ។ មនុស្សពិបាកនឹងមានចិត្តតស៊ូពុះពារទៅចាប់យកនូវអ្វីដែលខ្លួនមិនស្រឡាញ់ ទោះបីជាមានការជំរុញពីអ្នកជុំវិញខ្លួនយ៉ាងណាក៏ដោយ។ មនុស្សភាគច្រើនប៉ិនប្រសប់ទៅនឹងការងារដែលគេចូលចិត្ត ព្រោះពួកគេមានគំនិតក្នុងការតស៊ូព្យាមយាម ព្រមទាំងរៀនសូត្របន្ថែម ហើយធ្វើឱ្យពួកគេងាយចាប់បាន និងងាយយល់។ ការដឹងពីចំណង់ចំណូលចិត្តនេះ ធ្វើឱ្យមនុស្សស្គាល់ខ្លួនឯងកាន់តែច្បាស់ រីករាយនឹងធ្វើការងារដែលខ្លួនស្រឡាញ់ និងទទួលយកនូវអ្វីដែលជាខ្លួនឯងពិត ប្រាកដ។
២. ពិភាក្សាជាមួយអ្នកជំនាញដើម្បីទទួលបានយោបល់ល្អៗ : គប្បីចេះបង្កើតទំនាក់ទំនងជាមួយអ្នកដទៃ ពិសេស ជាមួយអ្នកជំនាញ ឬអ្នកមានបទពិសោធ ដែលធ្លាប់ឆ្លងកាត់នូវរឿងរ៉ាវជាច្រើន ដើម្បីទទួលបានយោបល់ល្អៗដែលអាចចាត់ទុកជាជំនួយជួយដល់ការសម្រេចចិត្តរបស់យើងក្នុងការកំណត់គោលដៅ។ លើសពីនេះ អ្នកជំនាញ និងអ្នកមានបទពិសោធទាំងនោះ នឹងបង្ហាញផ្លូវដល់យើងពីចំណុចដែលគួរ ឬមិនគួរ រាល់សកម្មភាពខ្លះៗ ឬក៏ប្រាប់ពីគន្លឹះណាមួយ ដើម្បីកំណត់គោលដៅរបស់យើងទទួលបានផ្លែផ្កាល្អ។ ដូច្នេះ យើងគួរចាប់យកឱកាសនោះ ដើម្បីសាកសួរព័ត៌មាន ឬចម្ងល់ទាំងឡាយណា ដើម្បីឱ្យយល់ច្បាស់ពីផែនការ និងរៀបចំគោលដៅកាន់តែលម្អិតមួយកម្រិតទៀត។
៣. បង្កើនចំណេះដឹង : ត្រូវខិតខំសិក្សា ឧស្សាហ៍អានសៀវភៅ និងធ្វើកិច្ចការស្រាវជ្រាវ រៀនពីចំណេះដឹងថ្មីៗក្នុងសង្គមឱ្យបានច្រើន ហើយត្រូវឆ្លៀតធ្វើការងារសប្បុរសធម៌ ការងារស្ម័គ្រចិត្ត មានភាពក្លាហានក្នុងការប្រឡូកក្នុងសង្គម ទើបយើងអាចបើកចិត្តគំនិតបានទូលំទូលាយ និងបានឃើញនូវចំណេះដឹងថ្មីៗ ជាបទពិសោធដែលនឹងដឹកនាំយើងទៅរកសម្រេចគោលដៅ។
៤. រៀបចំផែនការ និងអនុវត្តប្រចាំ : រាល់ការរៀបចំគោលដៅ ត្រូវតែមានផែនការច្បាស់ លាស់ថា ខ្លួនត្រូវអនុវត្តអ្វីខ្លះ និងនៅពេលណាខ្លះ? ដោយកំណត់ពេលវេលាជាប្រចាំ។ ចំពោះផែនការទាំងនោះ គឺត្រូវអនុវត្តឱ្យបានសមស្របទៅតាមពេលវេលាដោយយកចិត្តទុកដាក់ ទើបអាចអភិវឌ្ឍខ្លួនបានប្រសើរ។ ប្រសិនបើគ្មានការអនុវត្តតាមផែនការដែលបានកំណត់ នោះស្មើនឹងមិនបានរៀបចំផែនការ ហើយបើគ្មានការរៀបចំផែនការ គឺស្មើនឹងមិនមានការរៀបចំគោលដៅក្នុងជីវិត។
៥. មានឆន្ទ:មោះមុត : ត្រូវមានការតាំងចិត្តខ្ពស់ ព្រោះការអនុវត្តផែនការតែងមានឧបសគ្គរារាំង ដែលធ្វើឱ្យមានការរអាក់រអួលដល់ការងារយើងជានិច្ច ហើយការមានឆន្ទៈមោះមុតនេះ ជាកត្តាដែលជួយយើងឱ្យយកឈ្នះលើឧបសគ្កទាំងនោះ។ យើងត្រូវតាំងចិត្តឱ្យបានមុតមាំប្រសិនបើចង់សម្រេចគោលដៅឱ្យបានជោគជ័យ។ ទោះជាឧបសគ្គទាំងនោះ ធ្វើឱ្យយើងមិនសប្បាយចិត្ត ធុញថប់ ឬជួនកាលបាត់បង់ក្តីសង្ឃឹមយ៉ាងណាក្ដី យើងត្រូវដឹងថាឧបសគ្គទាំងនោះ តែងមានដំណោះស្រាយជានិច្ច។ ដូច្នេះ ត្រូវមានជំនឿជឿជាក់លើខ្លួនឯង ហើយបន្តជំហានទៅមុខដោយការតស៊ូ ព្យាយាមម្តងហើយម្តងទៀត នោះនឹងឈានទៅរកជោគជ័យ និងសម្រេចនូវគោលដៅរបស់យើង។
Illustrated by វឌ្ឍនៈ ច័ន្ទសុវិសុទ្ធ
