កាលពីថ្ងៃទី៧ ខែធ្នូ ឆ្នាំ២០១៩ កន្លងទៅនេះ សិស្សានុសិស្សថ្នាក់ទី១១ និងថ្នាក់ទី១២ នៃសាលារៀន អន្តរទ្វីប អាមេរិកាំង សាខាផ្សារថ្មី ជាង៤០នាក់ បានចូលរួមក្នុងកម្មវិធី «មហោស្របសត្វស្លាប និងធម្មជាតិ» ក្រោមអធិបតីភាពឯកឧត្តម ស្រ៊ុន ដារិទ្ធិ រដ្ឋលេខាធិការក្រសួងបរិស្ថាន នៅសាកលវិទ្យាល័យភូមិន្ទភ្នំពេញ។
រដ្ឋលេខាធិការក្រសួងបរិស្ថាន លោក ស្រ៊ុន ដារិទ្ធិ បានមានប្រសាសន៍ប្រាប់សិស្សានុសិស្ស និងយុវជនជាច្រើនរយនាក់ថា មហោស្រពនៅថ្ងៃនេះ ពិតជាមានសារៈសំខាន់បំផុតសម្រាប់យុវជនខ្មែរ ជាពិសេសបន្តជួយផ្សព្វផ្សាយអំពីសត្វស្លាបដ៏កម្រដល់មហាជនទាំងជាតិ និងអន្តរជាតិ បង្កើនអភិរក្សសត្វស្លាប ជាពិសេស ឱ្យយុវជនកម្ពុជាចូលរួមស្រឡាញ់ និងអភិរក្សនូវជីវចម្រុះ និងធម្មជាតិ។
រដ្ឋលេខាធិការក្រសួងបរិស្ថានបានគូសបញ្ជាក់ថា កម្ពុជាមានវត្តមាន និងទីជម្រកដ៏សំខាន់សម្រាប់ប្រភេទសត្វស្លាប ដែលជិតផុតពូជដូចជា ត្រយ៉ងយក្ស ត្រយ៉ងចំកំកស ខ្សឹប ត្មាតភ្លើង ត្មាតត្នោត ត្មាតផេះជាដើម។ ចំពោះតំបន់ព្រៃភ្នំ តំបន់ដីសើម តំបន់ទំនាប និងតំបន់ឆ្នេរភាគច្រើនមានសារៈសំខាន់សម្រាប់ជីវចម្រុះ ហើយតំបន់ទាំងនេះក៏មានសារៈសំខាន់ជាអន្តរជាតិ ដោយផ្ដល់សេវាកម្មប្រព័ន្ធអេកូឡូស៊ីយ៉ាងច្រើន ដែលជួយទ្រទ្រង់ដល់សោភ័ណភាពធម្មជាតិ បរិស្ថាន និងការអភិវឌ្ឍសេដ្ឋកិច្ចសង្គម វប្បធម៌ និងជីវភាពរស់នៅប្រចាំថ្ងៃរបស់ប្រជាពលរដ្ឋយ៉ាងសន្ធឹកសន្ធាប់។
បើតាមលោក ប៉ាំង លាងស៊ីម នាយកចាងហ្វាងសាលារៀន អន្តរទ្វីប អាមេរិកាំង សាខាផ្សារថ្មី បានឱ្យដឹងថា មហោស្រពនេះ ជាឱកាសដ៏ល្អមួយសម្រាប់បញ្ជ្រាបដល់កូនខ្មែរបានឈ្វេងយល់កាន់តែច្បាស់ពីជីវចម្រុះ ប្រភេទសត្វស្លាបជិតផុតពូជ បរិស្ថាន និងធម្មជាតិ ដែលកម្ពុជាយើងមាន ហើយសិស្សបន្តរួមចំណែកផ្សព្វផ្សាយ អភិរក្ស និងការពារនូវធនធានធម្មជាតិដ៏កម្រទាំងនេះ។
នាយកចាងហ្វាងបញ្ជាក់ថា បើសិស្សានុសិស្ស ឬយុវជនកម្ពុជា មិនបានដឹងឮ ឬច្បាស់ពីប្រភេទសត្វដែលកម្ររស់នៅក្នុងប្រទេសកម្ពុជាយើងនេះទេ នោះនៅថ្ងៃអនាគតនឹងដាច់ពូជជាក់ជាមិនខាន ព្រោះគ្មានអ្នកដឹងឮ ស្រឡាញ់ និងចូលរួមអភិរក្ស។ លោកបន្តថា បច្ចុប្បន្ននេះ សត្វស្លាបនៅកម្ពុជាមានចំនួន៦០០ប្រភេទ ហើយក្នុងចំណោម៦០០ប្រភេទនេះ គឺសត្វ៨ប្រភេទ ដែលកំពុងជិតផុតពូជនៅកម្ពុជា។
នាយកចាងហ្វាងដដែលអះអាងថា កត្តាដែលនាំសត្វមួយចំនួនជិតដាច់ពូជនោះ ក៏ព្រោះមកពីការដាក់អន្ទាក់ ការដាក់ថ្នាំបំពុល ការបំផ្លាញទីជម្រក ការចាប់សត្វយកមកចិញ្ចឹម និងយកមកធ្វើជាអាហារ និងសត្វកង្វះចំណីអាហារជាដើម។
សូមជម្រាបថា សាលារៀន អន្តរទ្វីប អាមេរិកាំង សាខាផ្សារថ្មី ជាសាខាមួយ ត្រូវបានគេមើលឃើញថា កំពុងមានសកម្មយ៉ាងផុសផុលបំផុតទាំងកម្មវិធីសិក្សានៅក្នុងថ្នាក់ និងការបញ្ជូនសិស្សានុសិស្សចូលរួមកម្មវិធីផ្សេងៗ ដើម្បីសិស្សទទួលបានចំណេះដឹង ចំណេះធ្វើ និងបទពិសោធថ្មីៗយ៉ាងទូលំទូលាយ សម្រាប់ប្រកួតប្រជែងទាំងថ្នាក់ជាតិ និងអន្តរជាតិ ទាំងបច្ចុប្បន្ន និងអនាគត។ នេះបើតាមគណៈគ្របគ្រងនៃសាលារៀន៕
