នៅថ្ងៃទី៦ ខែវិច្ឆិកា ឆ្នាំ២០១៩ នេះ ក្រុមហ៊ុន ម៉េងលី ជេ. គួច អេឌ្យូខេសិន (MJQE) ដែលមានលោកឧកញ៉ា វេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ បានចុះអនុស្សារណៈយោគយល់ (MoU) ជាមួយនឹង International Cultural Exchange Services (ICES) ដើម្បីបញ្ចូនសិស្សនៅកម្ពុជា បន្តការសិក្សានៅ៥៥ប្រទេស នៅលើពិភពលោក ព្រមទាំងលើកកម្ពស់វិស័យអប់រំ និងផ្លាស់ប្ដូរនូវបទពិសោធរបស់សិស្សានុសិស្សក្នុងតំបន់ ទៅកាន់ពិភពលោក។
បើតាមលោកឧកញ៉ា វេជ្ជបណ្ឌិត គួច ម៉េងលី បានមានប្រសាសន៍ថា ការចុះកិច្ចព្រមព្រៀងអនុស្សារណៈយោគយល់នេះ ដើម្បីផ្ដល់ឱកាសដល់សិស្សកម្ពុជាចាប់ពីថ្នាក់ទី១០ ដល់ថ្នាក់ទី១១ បានចូលរួមផ្លាស់ប្ដូរបទពិសោធ ការសិក្សា និងវប្បធម៌ អារ្យធម៌ ទៅកាន់សហរដ្ឋអាមេរិក ប្រទេសអង់គ្លេស អូស្ដ្រាលី កាណាដា ជប៉ុន អ៊ីតាលី បារាំង អាល្លឺម៉ង់ ហូឡង់ ថៃ និងប្រទេសជាច្រើនទៀត។
លោកឧកញ៉ា វេជ្ជបណ្ឌិត បញ្ជាក់ថា ក្នុងឱកាសបើកដំណើការនេះ ក្រុមហ៊ុនរបស់លោក នឹងផ្ដល់អាហារូបករណ៍១០០% ដល់សិស្សានុសិស្ស១នាក់ ដើម្បីទៅសិក្សានៅសហរដ្ឋអាមេរិក ចំនួនពេញ១ឆ្នាំ។ លើសពីនេះ ម្ចាស់ក្រុមហ៊ុនដ៏មានប្រជាប្រិយរូបនេះ បន្ថែមថា ក្រៅពីផ្ដល់អាហារូបករណ៍ដល់សិស្ស លោកឧកញ៉ាក៏បានផ្ដល់ឱកាសដល់គណៈកម្មការនៅក្នុងក្រុមហ៊ុនរបស់លោកបានទៅសិក្សាឈ្វេងយល់ពីប្រទេសបារាំង និងប្រទេសអង់គ្លេសរយៈពេល២សប្ដាហ៍ផងដែរ។
ក្រៅពីនេះ លោកឧកញ៉ា សង្កត់ធ្ងន់ថា ICES កម្ពុជា ជាភ្នាក់ងារផ្លាស់ប្ដូរកម្មវិធីសិក្សាសម្រាប់សិស្សវិទ្យាល័យរយៈពេលពេញ១ឆ្នាំ ទៅកាន់សហរដ្ឋអាមេរិក ចក្រភពអង់គ្លេស អ៊ឺរ៉ុប អាស៊ី អាមេរិកឡាទិន អូស្ត្រាលី អូសេអានី និងអង់តាក់ទិក។
ទាក់ទិននឹងបញ្ហានេះ អគ្គនាយក ICES ប្រចាំប្រទេសថៃ លោក Sangkarn AMSAMANG បានឱ្យអ្នកសារព័ត៌មានដឹងថា បច្ចុប្បន្ននេះ ICES មានទីស្នាក់ការទាំងអស់ចំនួន៥៥ប្រទេស នៅទូទាំងពិភពលោក។ អ្វីដែលពិសេសនោះ លោកថា ICES បានផ្ដល់សិទ្ធិផ្ដាច់មុខដំបូងគេបង្អស់ជូនដល់ក្រុមហ៊ុន ម៉េងលី ជេ. គួច អេឌ្យូខេសិន សម្រាប់ប្រចាំកម្ពុជា។
អគ្គនាយក ICES បញ្ជាក់ថា ICES កម្ពុជា បានសហការជាមួយ ICES ប្រទេសថៃ ក៏បានបង្កើតឱ្យមានកម្មវិធីបោះជំរំ កម្មវិធីសិក្សារយៈពេលខ្លី និងដំណើរទស្សនកិច្ចសិក្សាថែមទៀតផង។ ក្នុងនោះមានដំណើរទស្សនកិច្ចសិក្សាដូចជា អាមេរិក អង់គ្លេស អ៊ឺរ៉ុប់ ញូវហ្សេឡែន អូស្ដ្រាលី ជប៉ុន និងប្រទេសសង្ហបុរី ជាដើម។
បើតាមលោក ឡាយ សុភា ប្រធានមជ្ឈមណ្ឌលភាសា អេ អាយ អាយ បានឱ្យដឹងថា International Cultural Exchange Services (ICES) កំពុងទទួលបានការគាំទ្រ និងល្បីល្បាញ ពីបណ្ដាសិស្សានុសិស្ស និងអាណាព្យាបាលសិស្សជាច្រើនទាំងក្នុងសហគមន៍អ៊ឺរ៉ុប តំបន់អាស៊ី និងបណ្ដាប្រទេសជាច្រើន។
លោកបន្តថា International Cultural Exchange Services (ICES) ចាប់ផ្ដើមទទួលចុះឈ្មោះសិស្សទូទៅនៅកម្ពុជា នៅពាក់កណ្ដាលខែវិច្ឆិកាឆ្នាំ២០១៩ ខាងមុខនេះ ដែលមានទីស្នាក់ការកណ្ដាលស្ថិតនៅអគារលេខ២៥ វិថី៤០២ សង្កាត់ទំនប់ទឹក ខណ្ឌបឹងកេងកង រាជធានីភ្នំពេញ។
សូមជម្រាបថា International Cultural Exchange Services (ICES) ជាសេវាកម្មផ្លាស់ប្ដូរការសិក្សាអន្តរជាតិ ដែលបានបង្កើតឡើងក្នុងឆ្នាំ១៩៩១ នៅក្នុងសហរដ្ឋអាមេរិក និងមានការទទួលស្គាល់លំដាប់អន្តរជាតិ ក្នុងការផ្លាស់ប្ដូរបទពិសោធរបស់សិស្សានុសិស្សនៅលើសាកលលោក ដើម្បីជំរុញការយល់ដឹងវប្បធម៌អន្តរជាតិ ដល់គ្រួសារជុំវិញពិភពលោក។ នេះបើតាមការអះអាងដោយលោក Sangkarn AMSAMANG អគ្គនាយក ICES ប្រចាំប្រទេសថៃ៕
ថតដោយ៖ វ៉ង់ វណ្ណលីដា
