អត្ថបទ៖ អ៊ុន សុវិច្ឆ័យ
ក្នុងបទសម្ភាសន៍ក្រោមប្រធានបទស្ដីពី ការប្រឈម និងឱកាសសម្រាប់សហគ្រិនកម្ពុជាវ័យក្មេង លោកឧកញ៉ា គួច ម៉េងលី បានចែករំលែកទម្លាប់ល្អក្នុងការអភិវឌ្ឍខ្លួនឱ្យបានជោគជ័យថា ដើម្បីអភិវឌ្ឍខ្លួនឱ្យបានល្អ ត្រូវក្លាហានជាងមុន ព្យាយាមជាងមុន អត់ធ្មត់ជាងមុន ទទួលខុសត្រូវជាងមុន ព្រោះទំនុកចិត្តដ៏អង់អាចក្លាហាន គឺជាអាវុធដែលជួយឱ្យអ្នកវាយឈ្នះក្ដីសុបិនបានយ៉ាងមានប្រសិទ្ធភាព។ ដូចគ្នានេះដែរ ទំនុកចិត្តដ៏អង់អាចក្លាហាននេះ គឺជាឥទ្ធិពល នៃការរុញច្រាននាំឱ្យយើងជោគជ័យ។ ប៉ុន្តែប្រសិនបើអ្នកមានទំនុកចិត្តហួសហេតុ ឬមានអំនួតលើសលប់ខ្លាំងពេកនោះ នឹងធ្វើឱ្យអ្នកបរាជ័យ ព្រោះអំនួតរមែងនាំឱ្យយើងធ្វេសប្រហែល។ ដើម្បីអភិវឌ្ឍខ្លួនឯង អ្នកត្រូវហ៊ានជាងមុន និងព្យាយាមឱ្យច្រើនជាងមុន។
ឧកញ៉ា វេជ្ជបណ្ឌិត គួច ម៉េងលី ;មានប្រសាសន៍ថា បើចង់ក្លាយជាអ្នកដឹកនាំល្អ ត្រូវហ៊ានធ្វើ ហ៊ានសួរ ហ៊ានឆ្លើយ ហ៊ានសម្រេចចិត្ត និងហ៊ានទទួលខុសត្រូវ។ ជាការពិតបុគ្គល ដែលមានទំនុកចិត្ដចំពោះអ្វីដែលខ្លួនកំពុងធ្វើ មានការទទួលខុសត្រូវខ្ពស់ រមែងទទួលបានជោគជ័យក្នុងជីវិត។ បន្ថែមពីនេះ ដើម្បីឱ្យជីវិតកាន់តែមានឱកាសជោគជ័យទ្វេដង និងមានន័យពេញលេញថែមទៀត យើងគួរតែធ្វើអ្វីមួយដោយយុត្តិធម៌ មិនលម្អៀង សុចរិត អត់ធ្មត់ តម្លាភាព ឯករាជ្យភាព ឧត្ដមគតិ និងមានមនសិការខ្ពស់ ពិសេសត្រូវចេះដាក់ខ្លួនផងដែរ។
អ្នកជំនាញអប់រំរូបនេះ បានបញ្ជាក់ថា ការដាក់ខ្លួននៅទីនេះ មិនមែនមានន័យថា ដាក់ខ្លួនឱ្យគេជាន់ ឬឱ្យគេមើលងាយ ឬក៏ឱនលំទោនគេខុសបែបផែននោះទេ។ មានន័យថា យើងមិនធ្វើជាមនុស្សឆ្មើងឆ្មៃ មិនក្រអឺតក្រទម មិនអួតក្អេងក្អាង ឬមិនជិះជាន់អ្នកដទៃជាដើម ព្រោះសេចក្តីក្លាហានកើតចេញមកពីប្រភពបីយ៉ាង ក្នុងនោះ ទី១គឺចរិតពីកំណើត ទី២ មកពីភាពទ័លច្រក និងទី៣ មកពីចំណេះដឹងមិនទូលំទូលាយ។
លោកឧកញ៉ា វេជ្ជបណ្ឌិត គួច ម៉េងលី បានបន្ថែមទៀតថា «រៀនច្រើនកើនចំណេះ ប៉ុន្តែសូមកុំឱ្យតែពូកែរៀន ហើយមិនពូកែចេះ ដូច្នេះសូមរៀនឱ្យប្រាកដប្រជា ហើយកុំទាន់តក់ក្រហល់ កុំទាន់ពុះកញ្ច្រោល រកស៊ីតាមគ្នាទាំងមិនទាន់រៀនចប់ មិនទាន់មានចំណេះដឹង មិនទាន់មានជំនាញ មិនទាន់មានបទពិសោធច្បាស់លាស់ ព្រោះអាចធ្វើឱ្យបរាជ័យ។ ការប្រថុយរកស៊ីចូលគ្នា នៅពេលចំណេញដណ្ដើមគ្នា នៅពេលខាតឈ្លោះប្រកែកទាល់ទែងផលប្រយោជន៍គ្នា»៕
