គណៈគ្រប់គ្រង សាលារៀន អន្តរទ្វីប អាមេរិកាំង តាមរយៈមូលនិធិ ម៉េងលី ជេ. គួច នៅថ្ងៃទី២ ខែឧសភា ឆ្នាំ២០១៩ បានដឹកនាំសិស្សានុសិស្សរបស់ខ្លួនប្រមាណ៨០នាក់ ដើម្បីចូលរួមបរិច្ចាគសម្ភារសិក្សាដល់សាលាបឋមសិក្សា ឈើទាល ស្ថិតនៅក្នុងភូមិឈើទាល ឃុំឫស្សីស្រុក ស្រុកពាមជរ ខេត្តព្រៃវែង ក្នុងគោលបំណងរួមចំណែកលើកកម្ពស់វិស័យអប់រំ នៅតាមជនបទ។
ថ្លែងក្នុងឱកាសនោះ លោកស្រី រស់ យ៉ាណា ប្រធានសាលារៀន អន្តរទ្វីប អាមេរិកាំង បានលើកឡើងថា សម្ភារតម្រូវឧបត្ថម្ភដល់សាលាបឋមសិក្សាឈើទាល រួមមានសម្ភារសិក្សាប្រមាណ៦០០កញ្ចប់ សម្រាប់សិស្សានុសិស្សប្រមាណ៦០០នាក់ ធុងចម្រោះទឹកស្អាតចំនួន៣ បង្គន់អនាម័យចំនួន២ និងសម្ភារៈបង្រៀនមួយចំនួនទៀតដល់សាលាបឋមសិក្សាឈើទាល ចំណាយទឹកប្រាក់សរុបប្រមាណ២០០០ដុល្លារ។
លោកស្រី បន្តថា ជាមួយនឹងការផ្ដល់ជូននេះ លោកឧកញ៉ា គួច ម៉េងលី តាមរយៈមូលនិធិរបស់លោកគ្រោងផ្ដល់អគារសិក្សាមួយខ្នងដល់សាលាបឋមសិក្សាឈើទាលនេះផងដែរ ដើម្បីឆ្លើយតបនឹងការខ្វះខាតបន្ទប់រៀនរបស់សិស្សានុសិស្សនៅតំបន់នេះ។
លោកស្រី រស់ យ៉ាងណា សង្ឃឹមថា ការឧបត្ថម្ភនេះ ទោះមិនសូវច្រើន តែជាទឹកចិត្តដ៏ជ្រះថ្លាក្នុងការរួមចំណែកកាត់បន្ថយភាពក្រក្រី និងលើកកម្ពស់វិស័យអប់រំតាមជនបទ ជាពិសេសកិច្ចការសប្បុរសធម៌ទាក់ទងនឹងកុមារ ដើម្បីទទួលបានឱកាសអប់រំដ៏ល្អ និងសម្រួលដល់ការរៀន និងបង្រៀនរបស់លោកគ្រូអ្នកគ្រូដែលត្រូវការជាចាំបាច់។
ក្នុងឱកាសនោះដែរ លោក ស៊ីវ សាម៉ន់ ប្រធានគណៈគ្រប់គ្រង សាលាបឋមសិក្សា ឈើទាល លោកគ្រូ អ្នកគ្រូ រួមទាំងសិស្សានុសិស្សសាលាបឋមសិក្សាឈើទាល បានសាទរ និងថ្លែងអំណរគុណចំពោះសកម្មភាពដ៏សប្បុរសរបស់លោកឧកញ៉ា តាមរយៈក្រុមការងារមូលនិធិរបស់លោក ដែលបានបរិច្ចាគសម្ភារសិក្សា បង្គន់អនាម័យ ពិសេសបើបានអគារសិក្សា គឺបានជួយសម្រួលដល់ទុក្ខលំបាកនៃការរៀនសូត្ររបស់សិស្សបានកាន់តែច្រើន។
ទោះយ៉ាងណាក៏ដោយ លោក ស៊ីវ សាម៉ន់ លើកឡើងផងដែរថា ការឧបត្ថម្ភ និងការផ្ដល់ជូននូវសមិទ្ធផលទាំងនេះ គឺជាការចូលរួមយ៉ាងធំធេងមិនមែនសម្រាប់តែសិស្សានុសិស្សទេ គឺជួយសម្រាលទុក្ខលំបាករបស់ប្រជាពលរដ្ឋនៅតាមសហគមន៍ ជាពិសសេបានចូលរួមចំណែកអភិវឌ្ឍន៍សង្គមជាតិជាមួយរាជរដ្ឋាភិបាលក្នុងការកាត់បន្ថយភាពក្រីក្រផងដែរ៕
