ក្រុងបាងកក កំពុងជួបខ្យល់បំពុលកម្រិតខ្ពស់ ខណៈចុះអ័ព្វពេញផ្ទៃមេឃ
ប្រភពរូបភាព៖ The Straits Times
មជ្ឈមណ្ឌលត្រួតពិនិត្យគុណភាពខ្យល់ចំនួន៧០ បានរាយការណ៍ពីកម្រិតមិនមានសុវត្ថិភាពនៃការបំពុលខ្យល់ក្នុងក្រុងបាងកក គិតត្រឹមម៉ោង៧ព្រឹកថ្ងៃពុធ ហើយស្ថានីយ៍ចំនួនបួនបានរកឃើញកម្រិត «អាសន្ន» នៃភាគល្អិត PM2.5។ អភិបាលក្រុងបាងកក លោក Chadchart Sittipunt បាននិយាយថា កម្រិតនៃធូលីដែលមិនមានសុវត្ថិភាពនេះ ត្រូវបានគេរំពឹងថា នឹងបន្តរហូតដល់ថ្ងៃសុក្រ។
បើតាមការចេញផ្សាយពីសារព័ត៌មាន The Straits Times បញ្ហានេះ គឺបណ្តាលមកពីខ្យល់នៅទ្រឹង ការដុតកសិដ្ឋាន និងភ្លើងឆេះព្រៃ។
គិតត្រឹមម៉ោង៦ល្ងាចថ្ងៃពុធ ការអានសន្ទស្សន៍គុណភាពខ្យល់ (AQI) របស់ក្រុងបាងកក ត្រូវបានកត់ត្រានៅកម្រិតល១៦៦ ខណៈកម្រិតដែលលើសពី១០០ត្រូវបានចាត់ទុកថាមិនល្អសម្រាប់សុខភាពរួចទៅហើយ។ ចំណែកកម្រិតដែលលើសពី២០០ នឹងត្រូវបានចាត់ទុកថា ជាកម្រិតមិនល្អខ្លាំង ហើយកម្រិតលើសពី៣០០ គឺជាករណីគ្រោះថ្នាក់។
គួរបញ្ជាក់ថា ភាគល្អិត PM2.5 គឺសំដៅទៅលើភាគល្អិតនៃធូលីក្នុងខ្យល់ ដែលអាចជ្រាបចូលជ្រៅទៅក្នុងសួត និងបណ្តាលឱ្យមនុស្សស្លាប់មុនអាយុដោយសារជំងឺសួត និងបេះដូង ជាពិសេសក្នុងចំណោមមនុស្សចាស់ និងអ្នកដែលមានបញ្ហាសុខភាព។
ជាវិធានការណ៍ការពារ អភិបាលក្រុងបាងកក បានណែនាំប្រជាជនឱ្យពាក់ម៉ាស់មុខពេលចេញក្រៅ ហើយព្យាយាមជៀសវាងសកម្មភាពក្រៅផ្ទះ ក៏ដូចលើកទឹកចិត្តប្រជាជនឱ្យធ្វើការពីផ្ទះ និងប្រើប្រាស់ការដឹកជញ្ជូនសាធារណៈជំនួសផងដែរ៕
